يورپي يونين پنهنجن ميمبر ملڪن جي وچ ۾ ٿيندڙ تڪرارن جي حل لاءِ هيءَ عدالت قائم ڪئي، جنهن کي انهيءَ وقت يورپي يونين جي سپريم ڪورٽ جي حيثيت حاصل هئي، هي ادارو 1951ع ۾ ”يورپي برادري“ جي قائم ٿيڻ سان وجود ۾ آيو ۽ آهستي آهستي هن ڪورٽ جي قاعدن ۽ قانون جي دائري کي وڌايو ويو. هن ڪورٽ ۾ هر ميمبر ملڪ منجهان هڪ جج ڇهن سالن لاءِ کنيو ويندو آهي، جنهن جو مدو سندس ڪارڪردگيءَ مطابق وڌائي سگهجي ٿو. جج کي چونڊڻ جو طريقو تمام سخت آهي. هن عدالت لاءِ ميمبر ملڪن جي اهڙي جج کي چونڊيو وڃي ٿو، جنهن ڪڏهن به سياسي ياڪنهن ٻئي دٻاءُ هيٺ اچي فيصلا نه ڪيا هجن ۽ مختلف قانوني معاملن تي کيس مڪمل عبور حاصل هجي. عدالت ۾ عام طرح سان انگريزي ۽ فرينچ ٻوليون استعمال ٿين ٿيون، پر ضرورت پوڻ تي ڪو به ڪيس ميمبر ملڪن جي ٻولين ۾ پڻ هلائڻ جي اجازت آهي. ان کي ميمبر مُلڪن جي ادارن جي وچ ۾ ٿيل ڪنهن به معاهدي يا ضابطي کي ختم ڪرڻ، يورپي يونين جي پارليامينٽ، وزيرن ۽ ڪنهن به يورپي اداري جي خراب يا ڪمزور فيصلن تي اعتراض ڪرڻ ۽ يونين طرفان ميمبر ملڪن جي اندروني معاملن ۾ غيرضروري مداخلت کي روڪڻ جا اختيار حاصل آهن، ECJ جي قائم ٿيڻ سان يورپين يونين کي تمام گهڻو فائدو پهتو آهي. ECJ جي مدد سان يونين جون قانوني پيچيدگيون ختم ٿي وڃن ٿيون، جنهن سان هر ميمبر ملڪ کي هڪ جيترو فائدو پهچي ٿو.